لو كنتِ من الناس اللي ودهم يبدأون بيلاتس من بيتهم بدون ما يدفعون كثير أو يشتركون في استوديوهات، فأنتِ في المكان الصح. بهالتدوينة جمعنا لك قنوات يوتيوب تقدّم حصص بيلاتس مجانية، وكل وحدة لها طابعها وأسلوبها. اخترت لك قنوات متنوعة: بيلاتس ريفورمر، مات بيلاتس، وحتى عربية عشان ما يكون عندك عذر 😎🌟.
قنوات بيلاتس ريفورمر :
هذا النوع من البيلاتس يتطلب وجود جهاز الريفورمر، وهو جهاز بيلاتس مزوّد بحبال ومقاومات يساعدك تؤدين التمارين بشكل أعمق وأكثر دقة. مناسب للي اشتروا الجهاز ويبغون يستفيدون منه بتمارين احترافية في البيت💪.
ما عندك الجهاز؟ تقدرين تشترين الريفورمر من عندنا اضغط هنا للطلب.
1- Pilates Body with Michelle & Alexis
ميشيل وأليكسيس يقدّمون حصص بيلاتس ريفورمر بأسلوب هادئ وواضح. التمارين مرتبة ومناسبة للمبتدئين أو للي ودهم يبنون تكنيكهم بشكل صحيح من البداية. ما يركزون على الحماس أو التحدي العالي، بالعكس أسلوبهم تعليمي ومريح. مناسبة لو انت جديدة على البيلاتس وتبين تأسسين نفسك صح ما تدخلين تمارين أصعب.
2- Dez_fit
ديز تقدّم تمارين قوية ومركّزة أكثر، تنفع لو تبين شوي تتحدّين نفسك وتطورين لياقتك. شرحها واضح لكنها أقل "تفصيل" من ميشيل وأليكسيس، لأن حصصها تميل إنها تكون تمارين فعلية أكثر من دروس تعليمية وتحسين إنك جايبة مدربة عندك في البيت. مناسبة لو عندك شوية خبرة وتبين تزيدين القوة أو تبغين حصص فيها دفعة نشاط.
3- Melanie Lopez Pilates
ميلاني متنوّعة جدًا في حصصها، تمارينها "challenging but chill"، يعني بتدمج التحدي والراحة بنفس الوقت — مناسبة للكل سواء للبداية أو المتقدمين. تقدم تمارين شاملة للجسم بالكامل، تركّز على القوة والمرونة والتناغم الحركي . محتواها مصمّم لجميع المستويات (مبتدئ حتى محترف)، وتشرح استخدام الأجهزة خطوة‑ب‑خطوة . هي مدربة معتمدة وتقيم حصص في نيويورك، ما يعطيها مصداقية وخبرة عملية.
4- Jess P Fit
جيس تقدّم حصص قصيرة وعملية، تركّز على إنك تنجزين التمرين بسرعة بدون تعقيد. حصصها بسيطة بس مو تفصيلية جدًا، فإذا كنتي تبين شي سريع وسهل تدخلينه في يومك حتى لو كنت مشغولة بتناسبك. لكنها ما تعتبر قناة للتأسيس أو التعليم العميق.
5- Holistic Movement Pilates
هذي القناة مختلفة شوي لأنها تركز على الراحة النفسية والتنفس مع التمرين. التمارين غالبًا بطيئة ومركزة على الاتصال بين الجسم والعقل. لو تبين تمرين يهدّي أعصابك ويقلل التوتر، بتناسبك، لكنها ما تناسب لو هدفك رفع القوة أو اللياقة بسرعة.
6- John Garey TV
جون محترف وله خبرة طويلة في البيلاتس. حصصه مفصلة وفيها مستوى احترافي، ومناسبة للي يبغى يرتقي بالتمارين ويشتغل على التكنيك بشكل أدق. شرح ممتاز لكنه أحيانًا يكون معتمد إن عندك خبرة أساسية بالأجهزة ينفع للمتحرفين لأنه مايشرح الأساسيات ويدخل في التمرين على طول يعني لازم يكون عندك خبرة متوسطة إلى طويلة.
قنوات مات بيلاتس:
مات بيلاتس يعتمد فقط على وزن جسمك ورياضة على الفرشة (المات)، بدون الحاجة لأي أجهزة أو معدات. مثالي للبداية أو لو ودك تتمرنين بدون استثمار بجهاز.
1- Move with Nicole
نيكول أسلوبها لطيف وحصصها واضحة وسهلة المتابعة، وتركز على المرونة والقوة بدون أجهزة. مناسبة لأي مستوى، حلوة لو ودك تبنين روتين رياضي خفيف في البيت.
2- Blogilates
كاسي معروفة بحماسها وحبها للتمارين الجماعية، حصصها ممتعة وهي خفيفة دم ومليانة طاقة إيجابية. مناسبة لو تبين شي يشجعك نفسيًا ويحمسك، لكنها أحيانًا سريعة ويمكن تحتاجين تركزين على التكنيك بنفسك.
3- Pilates by Izzy
إيزي مميزة بأسلوبها الواضح والبسيط، تركز كثير على الأداء الصحيح عشان ما يصير عندك إصابات. حصصها ممتعة ومريحة.
4- Jessica Valant Pilates
جيسيكا أسلوبها متوازن، حصصها بسيطة ومريحة للمتابعة، ومعها نصايح صحية عامة بحكم تخصصها. مناسبة للمبتدئين أو للي يبون تمرين هادي وبدون تعقيد.
5- Zee Pilates and Barre (Zein Kabbarah)
زينة تقدّم تمارين بالعربي، أسلوبها واضح ومباشر، ومناسب للي ما يحبون يتابعون شرح إنجليزي أو يضيعون في المصطلحات. محتواها بسيط ومريح للمبتدئين.
في الختام
مهما كان مستواك، أكيد بتلقين قناة تناسبك من هالقائمة. المميز في القنوات هذي إنها مجانية وتقدرين تبدين من بيتك بدون أي التزامات. ادخلي القنوات وخذي نظرة سريعة على المقاطع وشوفي وش اللي يناسبك، والأهم استمتعي بالرحلة 🌟❤️.